Documento que describe, a posteriori, a xestión económica ou de actividades levada a cabo por un organismo ou por unha unidade calquera nun tempo determinado.
Estrutura
A memoria non segue a estrutura do informe, cos contidos delimitados en parágrafos etiquetados, senón que emprega o texto seguido. Isto non implica que non haxa unha ordenación temática como a que se explica a seguir. No caso de documentos moi amplos, dividirase en capítulos ou seccións co seu correspondente índice.
1 Cabeceira
- Titulo: indícase brevemente o tema, a unidade que realizou as actividades e o tempo empregado e destácase tipograficamente do resto do documento.
2 Corpo
Dada a gran variedade de contidos que se tratan, cada memoria ten a súa propia organización temática. Con todo, débense ter en conta, polo menos, dúas partes: a introdución e a descrición das actividades.
Así, pódese comenzar cunha introdución breve que presente as directrices que orientaron o labor que se describe ou empregar a estrutura xerárquica do organismo que emite a memoria como fío condutor.
Deseguido, menciónanse as actividades realizadas no período descrito. Esta relación agrúpase segundo diversos criterios: cronolóxico, segundo as áreas ou departamentos que as realizaron, segundo o tipo de actividades, etc. En calquera caso, pódense empregar métodos de información complementarios: datos estatísticos, táboas, gráficas e ilustracións.
3 Peche
- Lugar e data
- Sinatura: cargo, rúbrica, nome e apelidos-
4 Anexos
É habitual engadir documentos mencionados no corpo do texto.
Exemplo
MEMORIA ANUAL DA BIBLIOTECA ANXO CASAL
ANO 2003
Índice
1 Creación da biblioteca
2 Actividades
2.1 Presentación da biblioteca
2.2 Convenios de colaboración
2.3 Campaña de fomento da lectura
2.4 Recollida de novos fondos
3 Dotación
3.1 Fax
3.2 Equipo informático
3.3 Mobiliario
3.4 Papelería
4 Proposta de novas actividades para o ano 2004
4.1 Establecemento de intercambios bibliotecarios
4.2 Campaña O cinema na literatura
4.4 Homenaxe a Anxo Casal
5 Anexos
5.1 Carta de presentación
5.2 Ficha para outras bibliotecas
5.3 Listaxe de fondos
