Documentación administrativa. Documentos de constancia. O certificado

Documento que acredita a veracidade de feitos e de datos recollidos en actas, arquivos, etc.

Estrutura

1 Cabeceira

- Título: indicación breve do contido destacada tipograficamente do resto do documento.

- Identificador do emisor: nome, apelidos e cargo en función do que dá fe do contido do documento.

2 Corpo

- Núcleo: en primeiro lugar expóñense os datos que se han autenticar, baixo o epígrafe CERTIFICO:. A continuación relaciónanse os distintos feitos e a orixe da información, en parágrafos independentes encabezados por «Que» máis un verbo conxugado (se a redacción o permite).

Despois da certificación introdúcese a fórmula de constancia. Pode ser moi simple:

E para que conste, asino este certificado. 

Ou engadir máis datos se é preciso:

- Finalidade: para os efectos de …

- Lexislación que ampara a quen certifica: segundo …

- Solicitante: a pedimento do interesado / de …

- Validez temporal: válido ata … / por un período de …

Quen certifica debe utilizar a primeira persoa para referirse a si mesmo e a terceira para as persoas a quen se refire o obxecto da certificación.

3 Peche

- Lugar e data

- Sinatura: rúbrica

- Visto e prace ou Comprobado e conforme, se se establece esta posibilidade, e a continuación cargo, rúbrica, nome e apelidos.

 

Exemplo

 

CERTIFICADO

 

Nome e apelidos, secretario xeral da Consellería de Cultura e Deporte

 

CERTIFICO:

Que as persoas que abaixo se citan forman parte do cadro de persoal desta consellería como interinas:

Nome e apelidos, DNI 33 552 645

Nome e apelidos, DNI 36 785 866

Nome e apelidos, DNI 44 125 486

 

E para que conste, a pedimento da Dirección Xeral de Función Pública, asino este certificado.

 

Santiago de Compostela, 4 de outubro de 2003