Documento que recolle as decisións do órgano competente e que pon fin a un procedemento administrativo decidindo sobre todas as cuestións presentes neste.
Estrutura
1 Cabeceira
- Título: indicación breve do contido destacada tipograficamente do resto do documento.
- Asunto: breve descrición do obxecto da comunicación. Normalmente non aparece porque esta información inclúese no título.
- Identificación do procedemento: referencia, datos do interesado/a, tipo de procedemento e data de inicio do cómputo de prazos para a resolución.
2 Corpo
- Análise de datos: incorpora dous bloques temáticos.
. A relación de feitos que resumen as circunstancias do procedemento, con referencia ao feito que deu lugar á apertura do expediente. Aparecen ordenados en parágrafos independentes e numerados coa etiqueta FEITOS ou ANTECEDENTES.
. Os fundamentos legais e técnicos que serven de base para a valoración. No caso das indicacións legais debe especificarse o rango xerárquico, a denominación completa, o número, a data de aprobación e o número e data do diario oficial no que foi publicada. Aparecen ordenados en parágrafos independentes coa etiqueta CONSIDERACIÓNS LEGAIS E TÉCNICAS.
- Indicación da competencia: indícase a competencia que ten o órgano administrativo para resolver e cítanse as normas que o avalan. No caso de que a capacidade de resolver sexa delegada, deberase indicar na sinatura coa abreviatura «p. o.», ou «p. d.»-
- Resolución: indícase a decisión adoptada. Introdúcese cunha fórmula como: De acordo con todo o indicado, RESOLVO:
- Recursos: como parte da notificación, indícase se a resolución pon fin ou non á vía administrativa e o tipo de recursos que se poden presentar, órgano e prazos.
- Notificación: para garantir unha transmisión sen manipulacións, recoméndase realizar o acto da notificación no corpo do documento. Se a resolución lle afecta a un número indeterminado de persoas, ou ben se pode notificar, optarase pola publicación.
3 Peche
- Lugar e data
- Sinatura: cargo, rúbrica e nome e apelidos
Exemplo
RESOLUCIÓN DE MODIFICACIÓN DUN NÚMERO DE INSCRICIÓN NO REXISTRO DE ASOCIACIÓNS E OUTRAS ENTIDADES DE INICIATIVA SOCIAL
Expediente núm.: 327/03 Asunto: modificación de número de rexistro
Interesado/a: Asociación de Minusvalías Data de iniciación: Visuais 20/01/2003
Procedemento: modificación de erros Forma de inicio: solicitude do interesado
ANTECEDENTES
1 A Asociación de Minusvalías Visuais foi inscrita no Rexistro de Asociacións e outas Entidades de Iniciativa Social co número 22-CO-13-Xeral-21, de acordo coa Resolución do 3 de novembro de 2000.
2 A sílaba «CO» do número de rexistro indica a provincia e os dous últimos díxitos (21) o número de centros nos que esta asociación presta servizos.
3 Despois de examinar o expediente de inscrición desta asociación, detectouse un erro na asignación do número de rexistro, pois os dous últimos díxitos non indican o número de centros onde presta servizos na provincia da Coruña senón nas catro provincias da Comunidade Autónoma.
CONSIDERACIÓNS LEGAIS E TÉCNICAS
1 Esta entidade cumpre os requisitos esixidos segundo o artigo 3 do Decreto 264/1988 do 7 de xullo (BOE núm. 232, do 23 de novembro) en relación co artigo 16 da Lei de servizos sociais que establece os requisitos esixidos para a inscrición no Rexistro de Entidades de Iniciativa Social.
2 Na tramitación do expediente de inscrición observáronse as normas establecidas nos artigos 7 e 10 do Decreto 264/1988 do 7 de xullo, e a Lei 30/1992, do 26 de novembro, de réxime xurídido das administracións públicas e do procedemento administrativo común (BOE núm. 285, do 27 de novembro de 1992), modificada pola Lei 4/1999, do 13 de xaneiro (BOE núm. 16, do 19 de xaneiro de 1999, e BOE núm. 30, do 4 de febreiro de 1999), (LRX-PAC).
3 Segundo dispón o artigo 111 da LRX-PAC, a Administración poderá, en calquera momento, rectificar os erros materiais ou de feito e os aritméticos.
A Vicepresidencia da Igualdade e do Benestar é competente para resolver o expediente segundo o artigo 2 do Decreto 264/1988 do 7 de xullo.
De acordo con todo o indicado, RESOLVO:
Modificar o número de inscrición da Asociación de Minusvalías Visuais no Rexistro de Asociacións e outras Entidades de Iniciativa Social, e asignar un número por cada provincia na que posúe centros que prestan servizos sociais. O seu novo número de inscrición será: 22-CO-129-LU-0-0-OU-04-PO-123-Xeral-21.
Contra estar resolución que non pon fin á vía administrativa, poderá interpoñer, no prazo dun mes, un recurso de alzada ante o consellerio de Asuntos Sociais, Emprego e Relacións Laborais.
Mediante este documento notifícaselle á Asociación de Minisvalías Visuais esta resolución segundo o esixido no artigo 58.1 da Lei 30/1992, de réxime xurídico das administracións públicas e do procedemento administrativo común (BOE núm. 285, do 27 de novembro de 1992), modificada pola Lei 4/1999, do 13 de xaneiro (BOE núm. 16, do 19 de xaneiro de 1999, e BOE núm. 30, do 4 de febreiro de 1999).
Santiago de Compostela, 20 de febreiro de 2003
A secretaria xeral técnica
Nome e apelidos
