Documentación administrativa. Documentos de transmisión. O saúdo

Documento de carácter protocolario utilizado para comunicacións breves como agradecementos, felicitacións, ofrecementos, etc.

Estrutura

Pola súa natureza e obxectivos permite unha maior liberdade expresiva; así e todo débense evitar redaccións arcaizantes ou recargadas.

Polo seu carácter protocolario, pódense utilizar tratamentos, tanto para o emisor como para o destinatario. Por outra banda, este é un dos poucos documentos onde o emisor fai referencia a si mesmo en terceira persoa.

Habitualmente, o texto céntrase e utilízase un papel de medida inferior ao estándar para a comunicación administrativa.

1 Cabeceira

- Identificación do emisor: cargo, unidade ou organismo no que o desenvolve.

De xeito opcional, pode levar a seguir o nome e apelidos da persoa que o ocupa.

2 Corpo

Ábrese a comunicación coa palabra SAÚDA. En liña á parte indícase o nome e os apelidos do destinatario ou o seu cargo (en función da causa pola que se lle envía o saúdo) precedidos pola preposición «a», e o motivo do documento.

Ás veces, tras o texto de saudación engádese a invitación a un acto, polo tanto fúndense os dous documentos: invitación e saúdo.

Remata a redacción cunha fórmula de despedida como: E aproveita esta ocasión para lle manifestar a súa consideración máis sincera

3 Peche

- Sinatura: rúbrica. Aínda que é opcional, está en desuso.

- Lugar e data

 

Exemplo

 

A conselleira de Cultura e Deporte

Nome e apelidos

Saúda

Á presidenta da Fundación Carlos Casares e felicítaa polo seu nomeamento.

E aproveita a ocasión para lle manifestar a súa consideración máis sincera.

Santiago de Compostela, 19 de setembro de 2002