O pronome de complemento directo, na súa terceira persoa e na segunda de respecto, que son as apropiadas nas comunicacións administrativas, ten tres formas posibles, segundo se sitúe antes ou detrás do verbo:
O/LO/NO A/LA/NA OS/LOS/NOS AS/LAS/NAS
Poñelos de acordo non resultou doado.
Citouno para as 12:30 h.
Non a van convocar ata esta tarde.
O de complemento indirecto é LLE/LLES
Por favor, entrégalle esta copia á persoa qu o solicitou.
Como afectados neste proceso, remítolles unha copia das alegacións.
As confusións á hora de empregalos correctamente teñen que ver en moitas ocasións co traslado dos usos do castelán ao galego. Para evitalo, é bo ter en conta:
- A maioría dos verbos galegos son transitivos, é dicir, acompáñaos un complemento directo:
Recolleuno na porta da entrada e acompañouno ao rexistro.
- Se estes verbos levan un complemento indirecto de persoa, é que levan tamén un complemento directo:
Recolleulle a solicitude cinco minutos antes de pechar o rexistro.
Facer estas comprobacións permitiranos resolver a maioría das dúbidas sobre cal é a forma adecuada. Citar, advertir, requirir, informar, emprazar, convocar, invitar, notificar… son algúns dos verbos frecuentes cos que se cometen erros de gravidade á hora de sumarlles os pronomes.
Cítoo para que compareza o día 20 ás 13.00 h.
Como argumento, citoulle un artigo da lei de propiedade intelectual.