Pódense expresar con cifras ou con letras. Nos documentos de carácter económico, aconséllase escribilos dos dous xeitos co fin de que a letra explique o número.

Adxudícase pola cantidade de 12 335 € (doce mil trescentos trinta e cinco euros).

No caso de empregar letras hai que lembrar que a partir de vinte e un se escriben separados:

vinte e nove

corenta e dous

oitenta e sete…

Escríbense con cifras cando:

- Son cantidades superiores a 9 ou posúen decimais.

- Indican operacións, fórmulas científicas ou datos contables. Dentro de táboas, os enteiros poden escribirse de dous xeitos: 317 € /317,00 €. Nunha redacción non é posible o segundo porque entorpece a lectura.

- Expresan unidades dun sistema seguidas do seu símbolo: 30 m, 200 km, 8 l.

- Indican operacións ou fórmulas científicas.

- Son datas e van no corpo do documento.

- Corresponden a prezos, habitantes, apartados, páxinas, domicilios, artigos de textos legais…

- Van despois dun substantivo modificándoo: andar 3 

Escríbense con letra cando:

- Son cantidades inferiores ou iguais a 9. A excepción de listas, datas, unidades dun sistema se van acompañadas do símbolo e cando fan referencia a si mesmos:

3 copias do proxecto, 1 certificado de estar ao corrente de pagamentos coa Seguridade Social e 1 fotocopia do DNI

A técnica localizou restos da estrutura danada a 1 km de distancia

Ábreselle a plica correspondente ao solicitante número 6.

- Son cantidades aproximadas:

Irromperon na sala uns corenta veciños desconformes. 

- Expresan duración temporal:

Hai tres días que se publicou a circular informativa.

- Encabezan un título, un parágrafo ou unha oración.